ಜನಸಂಖ್ಯೆ ಆಧಾರಿತ ನಿಯೋಜನೆ ಜಾರಿ: ಆಶಾ ಕಾರ್ಯಕರ್ತೆಯರಿಗೆ ಸಮನ್ಯಾಯ ಕಾರ್ಯಭಾರ

ಬೆಂಗಳೂರು: ರಾಜ್ಯದ ಆರೋಗ್ಯ ಮತ್ತು ಕುಟುಂಬ ಕಲ್ಯಾಣ ಇಲಾಖೆ ಆಶಾ (ASHA) ಕಾರ್ಯಕರ್ತೆಯರ ಕಾರ್ಯವೈಖರಿಯನ್ನು ಸುಗಮಗೊಳಿಸಿ, ಜನಸಂಖ್ಯೆ ಆಧಾರಿತವಾಗಿ ಹುದ್ದೆಗಳನ್ನು ಮರುಹಂಚಿಕೆ ಮಾಡುವ ಮಹತ್ವದ ಆದೇಶ ಹೊರಡಿಸಿದೆ. ಈ ಕ್ರಮದಡಿ ಹೆಚ್ಚುವರಿಯಾಗುವ ಕಾರ್ಯಕರ್ತೆಯರಿಗೆ ಸರ್ಕಾರಿ ಆರೋಗ್ಯ ಸಂಸ್ಥೆಗಳ ಖಾಲಿ ಇರುವ ಗ್ರೂಪ್-ಡಿ ಹುದ್ದೆಗಳಲ್ಲಿ ಆದ್ಯತೆ ನೀಡಲಾಗುತ್ತದೆ.
ಪ್ರಮುಖ ನಿರ್ಧಾರಗಳು:
🔹 ಜನಸಂಖ್ಯೆ ಆಧಾರಿತ ನಿಯೋಜನೆ:
ಕೇಂದ್ರ ಸರ್ಕಾರದ ಮಾರ್ಗಸೂಚಿಯಂತೆ ಗ್ರಾಮೀಣ ಪ್ರದೇಶದಲ್ಲಿ ಪ್ರತಿ 1,000 ಜನರಿಗೆ ಒಬ್ಬ ಆಶಾ ಕಾರ್ಯಕರ್ತೆಯರು ಹಾಗೂ ನಗರ ಕೊಳಚೆ ಪ್ರದೇಶಗಳಲ್ಲಿ ಪ್ರತಿ 2,500 ಜನರಿಗೆ ಒಬ್ಬರಂತೆ ನಿಯೋಜನೆ ಮಾಡಲಾಗುತ್ತದೆ.
🔹 ಹೆಚ್ಚುವರಿ ಕಾರ್ಯಕರ್ತೆಯರಿಗೆ ಉದ್ಯೋಗ ಭದ್ರತೆ:
ಹುದ್ದೆಗಳ ತರ್ಕಬದ್ಧಗೊಳಿಸುವಿಕೆ (Rationalization) ವೇಳೆ ಹೆಚ್ಚುವರಿಯಾಗುವ ಕಾರ್ಯಕರ್ತೆಯರನ್ನು, ಅವರ ವಿದ್ಯಾರ್ಹತೆಗೆ ಅನುಗುಣವಾಗಿ ಆರೋಗ್ಯ ಇಲಾಖೆಯ ಗ್ರೂಪ್-ಡಿ ಹುದ್ದೆಗಳಿಗೆ ಹೊರಗುತ್ತಿಗೆ ಆಧಾರದ ಮೇಲೆ ಪರಿಗಣಿಸಲಾಗುತ್ತದೆ.
🔹 ಗೌರವಧನ ಹೆಚ್ಚಳಕ್ಕೆ ಪೂರಕ ಕ್ರಮ:
ಕೆಲವೆಡೆ ಜನಸಂಖ್ಯೆ ಹಂಚಿಕೆ ಸರಿಯಾಗಿಲ್ಲದ ಕಾರಣ ಆಶಾ ಕಾರ್ಯಕರ್ತೆಯರಿಗೆ ನಿಗದಿತ ಫಲಾನುಭವಿಗಳು ಲಭ್ಯವಾಗುತ್ತಿರಲಿಲ್ಲ. ಇದರಿಂದ ಪ್ರೋತ್ಸಾಹಧನಕ್ಕೂ ಪರಿಣಾಮ ಬೀಳುತ್ತಿತ್ತು. ಹೊಸ ಕ್ರಮದಿಂದ ಪ್ರತಿ ಕಾರ್ಯಕರ್ತೆಯರಿಗೂ ಸಮನ್ಯಾಯವಾದ ಕಾರ್ಯಭಾರ ಮತ್ತು ಪ್ರೋತ್ಸಾಹಧನ ಲಭಿಸುವಂತಾಗಲಿದೆ.
🔹 ವಿನಾಯಿತಿ ಪಡೆದ ಜಿಲ್ಲೆಗಳು:
ಭೌಗೋಳಿಕ ಸವಾಲುಗಳನ್ನು ಗಮನದಲ್ಲಿಟ್ಟು ಚಾಮರಾಜನಗರ, ಚಿಕ್ಕಮಗಳೂರು, ಕೊಡಗು ಮತ್ತು ಉತ್ತರ ಕನ್ನಡ ಜಿಲ್ಲೆಗಳನ್ನು ಮರುಹಂಚಿಕೆ ಪ್ರಕ್ರಿಯೆಯಿಂದ ಹೊರತುಪಡಿಸಲಾಗಿದೆ.
ಅನುಷ್ಠಾನದ ಗಡುವು:
ರಾಷ್ಟ್ರೀಯ ಆರೋಗ್ಯ ಅಭಿಯಾನ (NHM) ನಿರ್ದೇಶಕರ ಆದೇಶದಂತೆ, ಜಿಲ್ಲಾ ಆರೋಗ್ಯ ಮತ್ತು ಕುಟುಂಬ ಕಲ್ಯಾಣ ಸೊಸೈಟಿಗಳು ಈ ಪ್ರಕ್ರಿಯೆಯನ್ನು ಪ್ರಸ್ತುತ ಆರ್ಥಿಕ ವರ್ಷದೊಳಗೆ ಪೂರ್ಣಗೊಳಿಸಿ ವರದಿ ಸಲ್ಲಿಸಬೇಕಾಗಿದೆ.
ಈ ಕ್ರಮದಿಂದ ರಾಜ್ಯಾದ್ಯಂತ ಸಾವಿರಾರು ಆಶಾ ಕಾರ್ಯಕರ್ತೆಯರ ಕೆಲಸದ ಹೊರೆ ಸಮಾನವಾಗಿ ಹಂಚಿಕೆಯಾಗುವುದರ ಜೊತೆಗೆ, ಹೆಚ್ಚುವರಿ ಎನಿಸಿಕೊಳ್ಳುವವರಿಗೆ ಪರ್ಯಾಯ ಉದ್ಯೋಗದ ಅವಕಾಶವೂ ಸಿಗಲಿದೆ.